Toya Legen Gendhis Jawi

Nglampahi gesang ing ndusun saestu kathah samukawis ingkang ngangeni. Rikala taksih alit ngantos meh kelas kalih SMP, kula nderek gesang sareng Bapak-Simbok, Pak Tuwa (mbah kakung) lan Mbok Tuwa (mbah putri). Pak Tuwa pedamelanipan deres wit klapa ingkang saperlu kapendet legenipun kangge damel gendhis jawi.

Legen punika tlutuh manggar (kembang klapa) ingkang raosipun manis, miturut aturipun tiyang sepuh legen mekaten saged kangge jampi watuk. Pramila para wayahipun Pak Tuwa saestu remen ngunjuk legen punika kalebet kawula. Malah asring reka-reka watuk supados pun paringi taya legen ingkang raosipun tetep ngangeni ngantos sapunika.

Menewi legen sampun kaklempakaken dados sakwali lajeng pun godhog ngantos kenthel lan werninipun sampun dados kuning, ingkang saklajengipun dipun cithak mawi bathok klapa ingkang sampun pun bolongi ngandhapipun lan katutup godhong awar-awar. Sak sampunipun asrep bathok kawalik lan pun sebul saking bolongan ing ngandhap punika, gula lepasa sking bathok lajeng pun pepe ngantos saestu garing.

Gendhis jawi pun sade wonten peken lajeng pun tumbasaken uwos kangge paring tedhi sakulawarga kanthi lawuh ingkang prasaja nanging saestu eco, nggetihi lan paring kekiyatan ingkang cekap kangge makarya ing saben dina.

Read More

Golek Wah Entuk Wo

Yen pinuju dewekan banjur kelingan nalika isih sekolah ing EseMA ndhisik. Jenenge cah enom keladuk wani kurang duga, gonyak-ganyuk nglelingsemi durung duwe suba sita lan pikirane durung genep.

Wong ndesa Munggung, Karangdowo, Klaten ing watesing Kabupaten Klaten iring wetan sing sejangkah maneh mlebu Kabupaten Sukoharjo koq banjur sekolah neng kutha Klaten penere SMAN 1 Klaten. Weruh para kanca sing dasare wus sugih pada budhal sekolah nitih brong pit (sepeda motor/uduk) koq banjur tuwuh krentek ing jroning ati, wah ebo penake tur gagah yen aku ya numpak uduk ngono kuwi.

Dina Setu sore aku wus nyangking tas rangsel kluwuk, nganggo kaos oblong lethek, sandal jepit banjur ngadang bis kang tumuju Pedan ing saperlu mulih Munggung, Karangdowo lan mantep jroning ati bakal matur bapak nyuwun dipundhutke uduk. Udakara rong jam aku wis tekan ing omah gedhe tuwa sing durung dijobin opo maneh tegel lan keramik.

Ora sranta aku matur Bapak kang wis katon sepuh ngluwihi yuswane amarga rekasaning nyambut gawe, 'Pak, mbok kula dipundhutke uduk ben kaya kanca-kanca kae.' Bapak ngunjal ambegan sawetara banjur ngendika kanthi alon-alon kaya-kaya ngerti yen sing diadhepi bocah enom sing lagi murup. 'Le, ojo seneng golek wah ning pungkase wo.' Ora mudeng karepe Bapak sakjane aku, mung ndomblong, nanging Bapak banjur bacutake rembug, "lire mengkene Le, yen awakmu numpak uduk akeh wong padha alok wah elok ya anake Pak Hardi wis numpak uduk, ning bareng ngerti asal-usule uduk saka utangan banjur ngomong, wo....jebul utangan ta.'

Jleger!!! kaya bledheg nyamber-nyamber ing mangsa kesanga. Alhamdulillah, aku duwe Bapak kados jenengan. Nadya tetep ngebis nanging aku mongkok.

Read More

Dielingke

Durung jenak anggonku lungguh ing kursi kantor, sakwise sewengi nglakoni turu ing sak ndhuwure kreta Senja Solo kang ngeterke awak iki tumuju kutha Jakarta. Suwara ringtone ing hape sajak ngaru-ara, tak pandeng ing kacane hape tinulis ’Ummi Sayang’ pratanda yen sisihanku butuh mring aku. ’Ana apa dik? Koq sajak wigati, isih isuk tur nembe pisah koq wis kangen?’ mengkono pitakonku. Karo sajak sedih, sliramu banjur matur, ’Mas, Bapak dhawar saka gendheng langgar!!!’.  ’Innalillahi, wis ndang diplayokke neng griya sakit wae.’

Ora sawetara suwe, suwara hape muni maneh nadyan namung sedela kang asung pratanda yen ana sedulur sing paring warta kanthi ngirim pesen cekak (SMS). Tak bukak isi pesen sing pranyata saka adhi lanang Klaten sing surasane gawe geter uga. ’Mas, wektu iki Bapak, Nyemek (adhi wadonku), Sabriana lan Zakka (ponakan) lagi gering, wis telung ndina ora bisa tangi.” Innalillahi...

Astaghfirullah, sun sedhot jero ambegan nganti katon kebak ing jaja, sun bucal kanthi alus binarung istighfar tan kendhat. Tak unggahke lan tak udhunake, tak petani awak iki mbok menawa isih akeh penggawe ala mring sepada-pada utawa ngibadah sing ora nggenah.

Sun puji Gusti Alloh bareng wus ketemu underaning perkara, wus telung ndina iki anggonku maca kitab suci Alquran kurang setiti, sholat wengi rada lali. Alloh, nyuwun sih gunging pangaksami, astaghfirullah....astaghfirullah...astaghfirullah...

Read More

PR Basa Jawa

Jam 18.04 rampung anggonku futsal neng Kenari Mas. Motor silihan sing tak tumpaki banjur tak untir nganti bengok-bengok supaya bisa tekan kantor maneh lan isih keduman Maghriban. Alhamdulillah jam 18.20 wis tekan kantor ing tlatah Senen, Jakarta Pusat. Maghriban dhisik neng musholla cuilik kantor isih entuk jama'ah bareng Fitri arek Bagian Logistik.
Bubar sholat, komputer tak uripke, ndelengi laporan wulan sing durung rampung. Alhamdulillah ana sawijining cabang sing awan mau nggandhul, saiki wis isa dirampungi. Telipun gegem sing isih neng tas futsalku njerit-njerit, menehi pratanda menawa ana pawongan sing pengin ngendikan marang aku. Kewaca neng layare N2116 lawas jeneng sing tansah dadi gantilanku....'Ummi Sayangku' wah... bojoku nelpun iki.
Keprungu swara ing talipun saka Karanganyar-Solo ...'Bi, ajari gawe PR.' Anakku lanang sing nembe kelas papat SD nyuwun diwuruki gawe PR. 'PR apa nak?' pitakonku marang deweke. 'Gawe surat ijin ora mlebu sekolah amarga sakit ning nganggo Basa Jawa.' Gubrak!!!!
Tak awiti gawe layang idi kanthi ndekte anakku lanang. 'Katur dumateng bla.bla.bla......' alhamdulillah rampung, sanajan akeh ukara sing anakku durung ngerti karepe, nanging PR-e wis rampung. Kapan aku bisa kumpul banjur muruki sakabehing kabecikan marang kulawargaku.... Allohu Akbar.

Read More

Kawitane Kabecikan

'Mas... sesuk kula diajari ngisi nggih.' Keprungu swarane bojoku ing tlepun gegem sing wis sawetara nempleg ing kupingku. Mak dap!!! Jroning atiku, krasa kabeh luput tumanduk nyang awak iki... seprono suwene anggonku bebrayan karo slirane, jebul durung nate paring wuruk mungwing kabecikan.

'Insya Alloh....' tak jawab mengkono. Wah... bojoku wus awit wani ngisi kajian cilik neng desa sing rada adoh saka papan panggonanku. Pancen temen, kabecikan kuwi kudu ndang diwiwiti amarga wektu sing Alloh paringake marang awak-awak iki mung sedela.
Setu isuk tekan ngomah sawise sewengi numpak sawunggalih banjur sinambung Prameks tekan ing sutasiyun Palur, dipapag numpak uduk-uduk Beat sing dadi jaranane bojoku. Sawise leren sawetara, 'Dik.... sida diajari ngisi kajian pa?'. 'Nggih mas..'
Takbukai majalah Tarbawi lawas, golek wacan sing bisa dadi sangu ngisi kajian kanngo bojoku. Ketemu banjur mbuka Alquran golek maraji' supaya sing diaturke marang sedulur sing kajian pancen ana dasar sing gumathok.
Nyuwun jurung pamuji mugi saged kaleksananan sedaya kesaenan punika. Matur nuwun.

Read More

Mei Sepo

Mulih saka lapangan bubar Sholat Idul Adha... rasane weteng wis ora iso dikandani. Lha piye nyunnah yen meh Sholat Idul Adha luwih becik ojo maem dhisik.
Lha dhilalah... neng ngomah ora ono upa bengkong (sega) anane mung mie instan. 'Dik... mbok gawe mie ta, wetengku wis klurug je...' ngomongku marang Ummi (bojoku). 'Nggih mas...., sekedap nggih'. Sedela Ummi mbukak kulkas...... 'kantun mie goreng niku mas...?'. 'Sing rebus gak ana ta Dik...?. lha wong senenganku ki sing godhog je. 'Wonten mas, ning mung setunggal.' 'Yo wis... gawe loro sisan wae, siji rebus, siji goreng masake bareng wae'.....
Kocap....!!! Mie godhog wis mateng..., aku kebagian godhog, Ummi kebagian sing goreng. 'Dik, koq mie-ku rasane sepo?. 'Lah..... mie kula malah asin banget mas....!!!' Bareng ditelusuri..... jebul bumbu mie rebus disuntak pisan neng mie goreng..... Haduh..!!!!
Bareng tak pikir-pikir.. apa sing salah, jebule.... wulan iki Ummi durung tak wenehi gaji.... mulane disindir nganggo mie sepo.... Oalah Dik... ngapunten banget.

Read More

Semprotan Omo Tanduran

Bengi iki aku koq pengin banget nelpon bapak Klaten... e.... menawa ana apa-apa. Telpon diangkat banjur keprungu suwarane bapak, 'Assalamualaikum, piye le kabarmu. Aku koq krasa ora penak genahe neng omahmu ana kedadeyan apa?' Pancen bapak elok tenan wis ngerti sakdurunge pinarak. 'Itsar (anak lanang) lagi anget pak, Iffa (anak no.2) isih cemburu nang adhine, Dik Iyaz isih gayeng merga lara neng gegere.'

'Aku tak ngomong ya le, sakdurunge nyuwun sewu. Yen awakmu ana duit mbok aku ditukokne kitop*, mosok saben arep nyemprot kacang ijo kudu njileh nang tangga..... ora penak aku le'. Mak dhap rasane atiku, lha koq bapak ngomong nyang anake ndadak 'nyuwun sewu'..... sing kebangeten ki rak ya anake ta.

'Insya Alloh pak, suk yen bali tak aturke duite bene bapak gak usah njileh-njileh nyang tangga.'

*) Kitop = sprayer : piranti kanggo nyemprot omo tanduran.

Read More

Antarane garisan, rukuh lan clana lepis

Durung suwe anggonke mlebu kamar kost mulih saka musholla sholat Subuh, hape tua N.2115-ku wus muni tanda ana telepon sing mlebu. Tak sawang jeneng sing ketulis ono LCD wis apal 'Ummi Sayang', bojoku sing dhenok deblong nembe kangen. 'Assalamu'alaikum...... Bi, aku tukokne garisan ya sing padha nggone mas Itsar ono gambare kupu', suarane anak wadonku karo nangis. 'Insya Alloh, nduk..... suk yen Abi mulih'.
Dina Setu aku wus teka ana ing Papahan lan dijemput Ummi sing nggoncengke Iffa (anak wadonku). Sepeda motor takstater banjur gas takuntir motor BEAT mlaku. Ono ing ndalan Iffa wis wiwit guneman. 'Tenan lho bi, aku ditukokke garisan, karo rukuh, karo........... lepis (clana jean)'. Bocah iki!!!!! 'Nduk ya duwite Abi gak cukup yen nggo tuku kabeh lah, wis dipilih wae.... garisan, rukuh utawa lepis?, kudu mung salah siji lho!!!!. 'Yo wis naknu garisan sik wae'. Alhamdulillah pilihan sing pinter.
Isuk iku uga aku banjur ngeterke anak wadon menyang pasar, tuku garisan sing dikarepake, regone ora larang ning wis gawe atine ayem. 1.000 rupiah!!!!

Read More

Raos Syukur

Saben sholat jamaah wonten ing masjid Asy-Syifa, utaminipun saben sholat Dhuhur, Ashar Maghrib kula asring pinanggih pawongan ingkang damel manah kula sansaya rumaos kirang anggen kula syukur dumateng Alloh.

Pawongan punika ingkang sregep anggenipun sholat jamaah, lan anehipun pawongan punika 'nyuwun pangapunten' mboten kagungan suku kekalihipun lan namung anggadhahi satunggal asta ingkang kering kemawon. Saben lumampah namung ngangge asta ingkang kering punika kemawon.

Saben bibar sholat kiyambakipun medal saking masjid lajeng lelenggahan ing jawi masjid. Para jamaah ingkang sampun rampung anggenipun sholat sami medal, lan asring maringi arta marang pawongan niku wae, nggih wonten ingkang 1.000 wonten ingkang 2.000 lan mboten sekedhik ingkang maringi 5.000.

Kula boten nganggep pawongan punika 'pengemis' amargi praupanipun mboten kados pengemis, badanipun resik, potonganipun klimis lan ingkang damel kula tambah gumun..... sholatipun ingkang sregep.

Monggo sederek kita galih sesarengan, kita ingkang gadhah suku komplit, asta komplit napa sampun saged nglampahi sholat jamaah kanthi sae? Kados pundi mangke tanggel jawab kita sedaya ewonten ngarsanipun Alloh? Raos syukur kita punapa sampun cekap?

NB : Gambar punika sanes potretipun pawongan kasebat.

Read More

Kangene Bapak

Wingi isuk, mulih saka masjid bubar sholat Subuh ing HP tuaku (Nokia 2116) ana miscall kaping pindho. Takbukak jebul ana miscall saka 'Bapak Kakung' sing ateges saka Bapak kandungku sing neng Klaten. Janur gunung kadingaren Bapak nelpon aku, saumur-umur Bapak durung nate nelpon aku, adate Bapak mung pesen marang Adhiku wadon babagan apa sing dikarepake. E..... esuk iki koq nelpon aku, mesti ana perkara sing wigati tenan.
Aku banjur nelpon genti neng HP-ne Bapak, ben cetha ana pawartos apa?, sawise salam aku banjur takon, 'ana apa Pak koq kadingaren ngebel aku?'. 'Bapak kangen wae koq Le karo kowe, sawise kowe mrene karo bocah-bocah ing preen Tahun Baru 2009 wingi, rasane omah sepi..... kange aku Le karo suwaramu.' Duor!!! Kaya disamber bledheg rasane atiku, pancen kebangeten aku iki, ora nate caos kabar marang wong tuwa.

Read More